ដឹងពីតួនាទីពិត និង​​ស័ក្ដិ​ របស់មន្ត្រី​នគរបាល​ដែល​លើក​ជើង​ធាក់​ទៅ​លើ​មន្រ្តី​ចរាចរណ៍​​ជាប់កិច្ចសន្យាហើយ

បើ​តាម​មន្ត្រី​សាលា​ដំបូង​រាជធានី​ភ្នំពេញ បាន​ឲ្យ​ដឹង​ថា តាម​ពិត​មន្ត្រី​នគរបាល​ដែល​លើក​ជើង​ធាក់​ទៅ​លើ​មន្រ្តី​ចរាចរណ៍​ជាប់​កិច្ច​សន្យា​នោះ​ មិន​មែន​ស័ក្ដិ​៤ កន្លះ​ដូច​ដែល​ការ​ចុះ​ផ្សាយ​របស់​បណ្ដា​សារព័ត៌មាន​មួយ​ចំនួន​នោះ​ទេ។ តួនាទី​ពិត​ប្រាកដ​របស់​មន្រ្តី​នគរ​បាល​កោង​កាងមាន​ឈ្មោះ សៅ បញ្ញា អាយុ​៣៣​ឆ្នាំ​រូប​នេះ បច្ចុប្បន្ន​ពាក់​ត្រឹម​សក្ដិ​៣​ប៉ុណ្ណោះ មាន​ឋានៈ​ត្រឹម​អនុប្រធាន​ការិយាល័យ រដ្ឋបាល​សរុប នៃ​នាយកដ្ឋាន​ប្រឆាំង​បទ​ល្មើស​បច្ចេក​វិទ្យា របស់​អគ្គ​ស្នងការ​ដ្ឋាន​នគរបាល​ជាតិ​ប៉ុណ្ណោះ។

ឈ្មោះ សៅ បញ្ញា (រូបកណ្តាល)

តាម​ប្រភព​ដដែល​បាន​ឲ្យ​ដឹង​ទៀត​ថា មូលហេតុ​នាំ​ឲ្យ​មាន​ការ​យល់​ច្រឡំ ដោយ​សារ​មន្រ្តី​នគរបាល​រូប​នេះ ពាក់​អាវ​មាន​ស័ក្ដិ​៤ ហើយ​ឆ្នាំ​ក្រោយ​ទើប​លោក សៅ បញ្ញា ត្រូវ​ដំឡើង​ដល់​ស័ក្ដិ​៤។ ប៉ុន្តែ​គួរ​ឲ្យ​សោកស្ដាយ​មិន​ទាន់​បាន​ដំឡើង​ផង​លោក បាន​បញ្ចេញ​ចរិត​ដ៏​ខ្វះ​សីលធម៌​បែប​នេះ​ទៅ​ហើយ។

នាយឧត្តមសេនីយ៍ ជួន សុវណ្ណ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ​ បានបញ្ជាក់​ថា មន្ដ្រីនគរបាលពាក់ស័ក្តិ៣ ច្រឡំ​ថា​ស័ក្ដិ​៤​នេះ ត្រូវបានបញ្ជូនទៅដល់តុលាការហើយ នៅវេលាម៉ោងប្រមាណ​២៖២០នាទី រសៀល ថ្ងៃទី១០ ខែមករា ឆ្នាំ២០១៨នេះ ដើម្បី​វិនិច្ឆ័យ​ទោស​តាម​ផ្លូវច្បាប់។

នាយឧត្តមសេនីយ៍ ជួន សុវណ្ណ អគ្គស្នងការរង និងជាស្នងការនគរបាលរាជធានីភ្នំពេញ ​ធ្លាប់បានបញ្ជាក់ថា សម្រាប់មន្ដ្រីនគរបាលដែលប្រើអំពើហិង្សារូបនេះ យោង​តាម​បទ​បញ្ជា​ដ៏​ម៉ឺងម៉ាត់​របស់ អគ្គស្នងការនគរបាលជាតិ នាយឧត្តមសេនីយ៍សន្ដិបណ្ឌិត នេត សាវឿន គឺ​ដាច់​ខាត​ចាត់​វិធានការណ៍តាមផ្លូវច្បាប់ គ្មានការលើកលែងនោះឡើយ។

មន្រ្តី​ចរាចរណ៍​ជាប់​កិច្ច​សន្យា​ដែលរងគ្រោះ (ស្តាំ)

មន្រ្តី​ចរាចរណ៍​ជាប់​កិច្ច​សន្យា​ដែលរងគ្រោះ

សូម​បញ្ជាក់​ថា ករណីប្រើអំពើហិង្សាពីសំណាក់នគរបាល​ខាង​លើ​នេះ បានកើតឡើង នៅស្ដុបត្រឡោកបែក ដោយនគរបាលរូបនេះ បានបើករថយន្ដម៉ាក Ford ពាក់ស្លាកលេខភ្នំពេញ ​2AC-9099 ប៉ុន្ដែដោយខុសច្បាប់ចរាចរណ៍ ក៏ត្រូវបានក្រុមមន្ដ្រីជាប់កិច្ចសន្យានោះឃាត់​​ដើម្បី​សួរ​នាំ។ ពេលបម្រុងឃាត់សួរនាំនោះ​ ជនបង្កមិនព្រមឈប់រថយន្តនោះឡើយ លុះ​មួយ​ថ្ងៃ​ក្រោយ ក៏​បើក​មក​ម្តងទៀតស្រាប់តែចុះមករករឿងជនរងគ្រោះ រហូតប្រើហិង្សាតែម្តង។ ពេល​ចុះ​ពី​រថយន្ដ ជនបង្កបានទាញកអាវអូស ថែមទាំងធាក់ចំដើមទ្រូងមួយជើង ផ្ងា​ទៅ​ក្រោយ​បើ​ទោះ​បី​ជនរង​គ្រោះ បាន​លត់​ជង្គង់ និង​លើកដៃ​គោរព​ក្នុង​ន័យ​បង្ហាញថា សុំទោស​ក៏​ដោយ​នោះ៕

 

 

ដកស្រង់ដោយ៖ លោក ប៊ុត ហេង

ប្រភព៖ news.sabay

error: Content is protected !!