តាមពិត មុខងារថ្មី Explore Feed មានតែ ៦ ប្រទេសសោះ បូករួមទាំងកម្ពុជាយើងផងដែរ

កាលពីពេលថ្មីនេះ ក្រុមហ៊ុន ហ្វេសប៊ុក (Facebook) បានសម្រេចចិត្តជ្រើសរើសប្រទេសចំនួន ៦ ដែលរួមមានទាំងកម្ពុជាផងដែរ សាកល្បង​ធ្វើការបន្ថែមមុខងារថ្មី Explore Feed ជំនួសឲ្យ News Feed មុននឹងសម្រេចដាក់ឲ្យដំណើរការជាផ្លូវការទូទាំងពិភពលោក។

មុខងារថ្មីមួយនេះ (Explore Feed) ត្រូវបានក្រុមហ៊ុនហ្វេសប៊ុកដាក់ឲ្យដំណើរការបានទាំងនៅលើទូរស័ព្ទ និងកុំព្យូទ័រ។ កម្មវិធីនេះទៀតសោត ត្រូវបានប្រើដើម្បីជាបណ្តុំគេហទំព័រ (Facebook Page) ទាំងអស់ មិនថាអ្នកបាន Like ឫ មិនបាន Like ក៏ដោយ។

ជាធម្មតាយើងអាចទទួលបានព័ត៌មានពី Page ទាំងអស់ដែលយើងបាន Like ហើយរាល់ការបង្ហោះ (Post) ផ្សេងៗពី Page ដែលយើងបាន Like នឹងបង្ហាញឲ្យយើងឃើញដោយផ្ទាល់ ប៉ុន្តែពេលនេះដើម្បីមើលឃើញការបង្ហោះ (Post) ពីPage ដែលអ្នកបាន Like អ្នកត្រូវចូលទៅក្នុង Explore Feed។

ការ​កែ​សម្រួល​នេះ​មាន​ន័យ​ថា​ប្រសិន​បើ​ Page ទាំង​ឡាយ​ណា​ ចង់​បង្ហាញ​ខ្លួន​លើ​ News Feed គឺ​ត្រូវ​ចំណាយ​លុយ​​លើ​ការ​ផ្សព្វផ្សាយ​ជា​មួយ​ហ្វេសប៊ុក ឬការបង្ហោះ (Post) របស់​ Page នោះ​ត្រូវ​បាន​គេ​ចែក​រំលែក (Share) លើ​ Timeline ឬ ក្នុងក្រុម (Group)។

ក្រុមហ៊ុន Facebook បានបញ្ជាក់ឲ្យដឹងផងដែរថា ការដាក់ដំណើរការសាកល្បងនេះ ក្នុងគោលបំណងចង់ដឹងថា តើនឹងមានការពេញចិត្ត ឫ មតិរិះគន់ខ្លាំងប៉ុណ្ណាពីអ្នកប្រើប្រាស់? ប្រសិនបើមិនមានមតិរិះគន់ ហើយវាមានដំណើរការល្អ ក្រុមហ៊ុន Facebook នឹងពង្រីកការដំណើរការមុខងារថ្មីនេះ ទៅកាន់បណ្តាប្រទេសផ្សេងទៀត នៅលើពិភពលោក។

មុខងារថ្មីនេះ អាចនឹងជះឥទ្ធិពលយ៉ាងខ្លាំងដល់អ្នករកស៊ីតាមអនឡាញ មិនថាអ្នកប្រើប្រាស់ Facebook ឫ Website នោះទេ ព្រោះវាធ្វើអ្នកទាំងនោះពិបាករកអតិថិជន អ្នក Like និងអ្នកចូលក្នុងគេហទំព័រ ខណៈអាជីវកម្មអនឡាញបានចាត់ទុកហ្វេសប៊ុកគឺជាប្រព័ន្ធផ្សព្វផ្សាយដោយសេរី និងឥតគិតថ្លៃជាយូរមកហើយ

គួរជម្រាបផងដែរថា ប្រទេសដែលយកមកធ្វើការពិសោធន៍សាកល្បងទាំង៦នោះរួមមាន៖ ប្រទេសកម្ពុជា ស្រីលង្កា ប្រទេសបូលីវី ស្លូវ៉ាគី ស៊ែប៊ី និងប្រទេសហ្គាតេម៉ាឡា ហើយខណៈពេលនេះក្រុមហ៊ុន Facebook ក៏មិនទាន់មានគម្រោងថានឹងដាក់ដំណើរការមុខងារថ្មីនេះទូទាំងពិភពលោកនៅឡើយដែរ៕

 

ដកស្រង់ដោយ៖ លោក ប៊ុត ហេង

ប្រភព៖​ business-cambodia