ទំរាំមកដល់ថ្ងៃនេះ ត្រូវអ្នកជិតខាងមើលងាយរាប់ឆ្នាំ តែលទ្ធផលចុងក្រោយ…

ជីវិត​អ្នក​ក្រ មិន​មែន​ស្រួល​ដូច​ចិត្ត​ចង់​បាន​ឡើយ ទោះ​បី​មិន​ប៉ះ​ពាល់​គេ ក៏​គេ​អាច​មើល​ងាយ​ពេប​ជ្រាយ​​បាន​គ្រប់​ពេល ជា​ពិសេស​គឺ​អ្នក​ជិត​ខាង​តែ​ម្ដង។ និស្សិត​កម្រិត​បរិញ្ញាបត្រ​ម្នាក់​នៅ​ប្រទេស​ថៃ បាន​បង្ហោះ​រូប​ភាព​ប៉ុន្មាន​សន្លឹក រៀប​រាប់​ពី​ជីវិត​ពិត ដែល​អ្នក​ជិត​ខាង​មើល​ងាយ​រហូត​មាន​ថ្ងៃ​នេះ ត្រូវ​បាន​អ្នក​លេង​បណ្ដាញ​សង្គម​ចែក​ចាយ​រាប់​ម៉ឺន​ដង​ត្រឹម​ពេល​យ៉ាង​ខ្លី។

បើ​តាម​សារព័ត៌មាន Khoasod របស់​ប្រទេស​ថៃ បាន​បញ្ជាក់​ថា ក្រោយ​ឃើញ​រូប​ភាព​ដ៏​រំជួល​ចិត្ត​លើ​គណនី Facebook របស់​និស្សិត​ឈ្មោះ Goppy Suebsamut ភ្លាម អ្នក​យក​ព័ត៌មាន​ក៏​បាន​ទាក់​ទាញ​សម្ភាស​ភ្លាម​ផង​ដែរ ដើម្បី​ចង់​ដឹង​រឿង​រ៉ាវ​ពិត។

រូប​ភាព​ប៉ុន្មាន​សន្លឹក ដែល​បង្ហោះ​ដោយ​និស្សិត​ស្រី​រូប​នេះ ទទួល​បាន​ការ​ចែក​ចាយ​ជាង ៤​ម៉ឺន​ដង និង​ការ​​ចុច like ជាង ៦​ម៉ឺន​ដង អម​ដោយ​ពាក្យ​សរសើរ និង​លើក​ទឹក​ចិត្ត​ជា​ច្រើន។

ប្រភព​ដដែល បាន​ឱ្យ​ដឹង​ថា គ្រួសារ​របស់​និស្សិត​ស្រី​រូប​នេះ ជា​អ្នក​ស្រែ​ចម្ការ និង​មាន​ស្ថានភាព​ជីវិត​ក្រ​លំបាក​បំផុត។ នៅ​អាយុ ៧​ឆ្នាំ ម្ដាយ​ឪពុក​របស់​និស្សិត Suebsamut បាន​លែង​លះ​គ្នា។ ក្រោយ​មក យាយ​ក៏​ស្លាប់​បាត់។ ពេល​ម្ដាយ​មាន​ប្ដី​ថ្មី នាង​គ្មាន​ទី​ពឹង​ជាប់​លាប់​ឡើយ ព្រោះ​មិន​អាច​រស់​នៅ​ជាមួយ​ឪពុក​ចុង​បាន។ នាង​ក៏​​ត្រូវ​ជីវិត​យ៉ាង​ត្រដាបត្រដួស​ជាមួយ​ជីតា​ចិត្ត​ធម៌​ម្នាក់ ដែល​សព្វ​ថ្ងៃ​មាន​អាយុ ៨០​ឆ្នាំ​ហើយ។

ជីតា​របស់​នាង បាន​ធ្វើ​ការ​ច្រើន​ម៉ោង ធ្វើ​ការងារ​សព្វ​បែប​យ៉ាង ដើម្បី​ឱ្យ​នាង Suebsamut បាន​រៀន​សូត្រ​បន្ត។ រហូត​ទប់​ទល់​លែង​បាន ក៏​ត្រូវ​លក់​គោ យក​មក​បង់​រៀន​នៅ​សាកលវិទ្យាល័យ។ ពេល​នោះ អ្នក​ជិត​ខាង​បាន​សើច​ចំអក​រូប​នាង និង​ជីតា​ថា៖ “ឱ្យ​រៀន​ធ្វើ​អ្វី គ្មាន​ប្រយោជន៍​ទេ។

ទៅ​រៀន​នៅ​ទី​ក្រុង ដឹង​តែ​មាន​កូន​មុន​ពេល​រៀន​ចប់​ហើយ”។ ពាក្យ​​លឺ​ផ្ទាល់​ត្រចៀក​នេះ ធ្វើ​ឱ្យ​នាង​ខឹង​ខ្លាំង​ណាស់ ប៉ុន្តែ​ប្រឹង​ទប់​អារម្មណ៍។

ទោះ​ម្ដាយ​មាន​ថ្មី​មែន​ពិត ក៏​ផ្ញើ​លុយ​ឱ្យ​នាង​បាន​រៀន​ខ្លះ ប៉ុន្តែ​តិច​តួច​ណាស់ ព្រោះ​ត្រូវ​ចិញ្ចឹម​កូន ២​នាក់​ផ្សេង​ទៀត។ ចំណែក​អ្នក​ទំនុក​បម្រុង​ធំ​បំផុត​គឺ​ជីតា ដែល​លក់​គោ ឱ្យ​នាង​រៀន។ ក្រោយ​មក នាង​ក៏​បាន​រក​ការងារ​ក្រៅ​ម៉ោង​ធ្វើ ដើម្បី​សន្សំ​លុយ​ជួយ​ដល់​ជីតា​វិញ។

ត្រឹម​អាយុ ២៣​ឆ្នាំ នាង​អាច​មាន​ការងារ​ល្អ​ច្រើន​កន្លែង និង​ទទួល​បាន​ប្រាក់​ខែ​គ្រាន់​បើ​ដែរ ដើម្បី​ផ្គត់​ផ្គង់​ជីវភាព ព្រម​ទាំង​ទិញ​បាន​ទាំង​ឡាន​មួយ​គ្រឿង និង​ដឹក​ជីតា​ជូន​ដើរ​លេង ហើយ​ទទួល​ទាន​ម្ហូប​ថ្លៃ​ថ្លៃ​ទៀត​ផង៕

 

ដកស្រង់ដោយ៖ លោក ប៊ុត ហេង

ប្រភព៖ cambodiawikinews